Махачкала шегьерди 4 декабрес Общероссийский халкьдид фронтара Дагъыстандид меркездид Ленинский комсомолад парка выгыр ай патриотический акцие, да1вие дыркьыбыр йик1иы хъыдгыр агъмиш дыъыр. Гьади иштрак гьыъыбише баласды ихтилатбыр гьыъыр да1вие гъалиб дишидбишикла, гъийгъад йыгъайикьама да1вие сюдгюр ахъджыдгыбишикла (неизвестные солдаты), ва гьабишды дурубыр вышди, шивди гьахъагур, гьац1ара хъыъыникла волонтерашды кюмгюхьван «Возвращенные имена» — рухьуд специалистешды центрадире.
Информагентстводид хабардыхьван, гьади йишид акциеди Халкьдид фронтад региональный членешыла на активистешыла гъайри иштрак гьыъыр ай ДРО-ед представителеше «Юнармия», эскерешды нинабашды Комитетере, Всероссийский Общественный движение «Волонтеры Победы», РД-над МВД-дид Общественный советере, ва Россиядид Самооборонадид Комбат Федерациедире ва маддыбише.
Гьади сыт1а дишибише Великий Отечественный да1вие дыркьыдбишис ра1хмет выъыр са т1екьийкьеды гийдхьир.
Гьадыла хъуъ дыркьыдбишды бегедедбише на юнармейцеше кьыле дыъыри 23 дагъыстанабыр, Великий Отечественный да1вие дыркьыр ва кидхьир ад «Неизвестный солдатар»-на Вена на Берлин рухьуд шегьерма. Акцие бегьем вишидыла хъуъ Воин-освободителед памятникеде лихьири быч1быр. «Йийц1ыр сен йиъий ихьды дыркьыд ватана1гьлийшикла, давие Ватан уву1ху1ре дыркьыд, са хабар-этер адишды йик1иы гъамадишды.
Волонтераше ахтармиш хъыдыъыр, гьили кидхьир ади, гьахъадгур 23 дагъыстандады ватанагьлиер (земляки).
Гьабыр дыркьыр ай да1ви лабт1усды аахирес ка, китхьир ай Берлин шегьерди Панково на Трептов паркма. Гъийгъа выгыд акцие да1вие дыхьыд йигитер йик1иыла утха джыдыъынид виъий»,- гьухьури региональный штабад член Джамалудин Шигабудинова.
Гьеми арыди хьуъ гет1ир ад волонтерашды гволахбыр, ихтилатбыр, дыркьыр ад ихьды йигитешды дур агъмиш хъыъыр йик1иы лихъийинис гюре эккед сагьул выъыри. Гьа волонтераше кюмег гьыъыри гьахъагус гьабыр дыркьыд ербыр, гьабыр эскерва1ли дишид частьбыр, гьила призыват дыъырди ва гьили кидхьирди. Йиц1ды региона ахъадгыр ай йигитешды бегедедбыр, гьабишис йийц1ыр сен йиъий дыркьыд джига джац1ара ад.
Мира Казиева
