24 июлес Карабудахкентский районди «Солнечный берег»-хьур отдыхад базади ачых выъыр динмыд джигьилешды форум.
Гьа форума иштрак гьыъыр ай балад ихьды ху1киметед регионмады джигьилеше, мийманарна гьадиъ сес выъыр ай динмыд ва халькдид дур-ун ад илсанар, диндид экспертер.
Форумад гвалах викиси 7 йыгъад арыди. Гьа вахтинди гьади абишда хъадацус йикиси лекциямыхда, гадхъа1с киномыхда, иштрак гьаъас спортад дюльхъинма, таныш дикис архитектурадид памятникмыхьван, сасынийихьван таныш-билиш дикис ва отдых гьаъас Каспийскадид деръягьа.
Форум выгыргара адбыр диъи РД-над Правительство, республикадид Муфтият, РД-над диндид Комитет, Махачкалдид Урусашды православный Килисе, Иудейский общинамыд Совет.
Ачых выъыр форумад гвалах РД-над Правительствадид Седриед заместитель Рамазан Джафарова. Салам сувгъудыла хъуъ сыт1а дибибишиы, вице-премьере выгыргара ад форумас эккед кьимет выри. Хьели кьыле гьыъыр форума сигыр ад Дагъыстанад Кьухьды Рамазан Абдулатиповад кагъат: «Гьу1мирдихьван ха1р са конфессиямыд, нациемыд илсанар сыт1а шюбе ка ешемиш диъий Дагъыстана. Архыда архыди гьабише у1ху1ре ай джуьхьды йыхды гьадатбыр, вылц1ара гьакьалбыр хъуъ къубишис, гьадыхьван сыт1а ма1хкам ваъара россиядид агъвалат.
Гъийгъа сиене Россияди ад динмыд илсанашды фикирбыр, хиялбыр ц1ине руъура а. Гъара дуруъуд ихьды ху1кимете баладбише фаам гьаъара, ене илсанаше Россияди мездикма, храмма, сенагогама дуруъудула саваенди, эккене иштрак гьаъара ху1киметед гвалахма ки. Динди ад джигьилеше гъийгъа гьадгва даъара джва1р тербие абырна, кьылевыъыд на ва культурадид абыр ана… Е сиене гедкьыр а — эдемивалид дюзды ра1хъ лаъ вишин бадана, мыхьджеб джыъыр сасыныйихьван далгыр йыгара, дуьнйады да1ви-къал джившир ва сыт1а аъ-гъаъ йыдкьын ха1р са конфессиямыд бырдж йиъи. Умуд а, ми форума ва1 сасыныйихьде йыхана гедкьаси, сасыныйис бегеде дикиси, хыдыймар дикиси, гьа кар и ес ки баласды йыгад».
Р. Джафаров гьалгыдыла хъуъ джигьилешды динмыд форум официально ачых выъыр.
Гъана гьалгыри РД-над Муфтиед сахьусды заместитель Идрис Асадулаев, гьание гьухьур: «Ес гьац1ара, Россия — гьасад ху1кимет виъи, мысга сыт1а ешемишне ад ха1р са балад национальностмыд ва конфессиямыд илсанар. Ихьды джигьилешда леч1ур йыгара уву1ху1с гьад савалды илсанашды мидыла хъуъ ки ху1кимет йыха вишин бадана.
Ми форумара гьагва гьаъара а, е ешемиш диъи хьур ихьды ху1кимете са хизан ка. Шыв йиширди ки, сахьусды ера гъа савалды уву1ху1н, сыт1а гвалах выъын, Россиядид къадри вишин. Еда гьа кар леч1уси, е гьа кар субут гьаъара а. Гьадис гюре е сагъул ваъара Элигъанийис…
Махачкалдид РПЦ епархиедид секретарь Отец Иоанна гьухьур, форумад натидже виъи «…е лешун хыле атабабыйшды йыхды гвалахбыр, гьабыр уху1н ва гьабыр гьац1ара гьыъын хуъ хъубишис».
«Ма шиви яхда ад? Ху1рмет, мийманвалды, сыт1ад гвалах ихьды ватан бадана ва эдемивалдыбыр. Гьадыла и ихьды ху1кимета хыл выгыргас чалышды гъара, амма е чалыш диъи гьабыр уху1с — ва православныер ки, ва мусурманар ки, ва иудеер ки. Ес сиъинбишис ихьды хизан выгара увуху1с, хынимер дюху1с, тербие выс гьабишис ватан хъывгасна. Ес йыгардиш маддыбишды хиялбыр на ниятбыр. Ва гьадид бадана е мааки са дишир йыгара»,- гьухьур гьание.
Мусурманас кубас ният ана хылаб лешус хьед адишди, ихтияр а накьудихьван лешус, ва гьаса православныес ки крестится йикис йыгади, ихтияр а хьидид ериндире навкь ишлемиш ваъас. Гьадыхьван сыт1а Отец Иоаныс гьухьус йыгад йиъий, е джурадбыр диъинекун ки динма, амма балад джигима е са диъи…
Хьели ч1ел выр ай РД-над евреешды общинамыд Советед седри Валерий Дибияевас ва мадды мийманашис.
Гьади форума генеки иштрак гьыъыр РД-над Минпечатат ва Миннацад кьухьдыбише Рашид Акавова ва Татьяна Гамалейе ки ва маддадише.
Б. МЫХАIДЫ
