Да1ви лабт1уд сенбыр йиъий. Кьва1р да1вие дишид яраллы хыдиймар диъий кют1юр ад балинцеди. Сабыйды хыди гъу1лиде кут1ур ай, сабыйды ки ригиде. Ха1р йыгъа гьеми гъу1лиде хадбыйды хыди гъу1ля гъаъ гакъара сулкьарай, тини ригиде кут1ур адбыйды хьылынды ригихда гакъарай.
Ригиде хадбыйды хыдиес гудж ай йик1иклана, выдж ригиде ха, тимбыйды гъулиде ги хьур. Гьанийис гъу1ля гъаъ дуьнйа гьувгара, зас гьувгардиш хьур.
Ха1р хылис ригиде хад хыдыере хулкарай джуду хыдиеда, вас шыв гьабгура гъуля гъа гакъади? Гъулиде хад хыдиере ки ихтилат гьаъарай, гъаъ шыв а1гьвалат ади, выш гьабгурди. Гъийгъа дуьнйа ц1ыда виъи, рухьура, гьади хьураа саъка хьед йиъи темизды, къирхыдаа саъ хынимер хьиде а1дубч1ура а, са сурука к1абал, к1абал вишир кьа1сдыбыр сыкьыр а темизды гьавыды гъаъ а1гъа1ч1ур ад. Эли ха1ле юкьсура гыбылбыр сыт1а руъура а, шурукмашды ц1ев-ц1евед ун а лийчир ад. Гьеми гъу1лиде хад хыдиере ха1р йыгъа гьеминийис ха1р джурана дуьнйадид быт1рава1лид таариф гьаъара. Амма ригиде хадбыйды хыди т1улкьара хьед руъурай, гьанийис гъаъ дуьнйа гьувургара, зас гьувургардиш хьур. Гьадид гуджере йыгъ-йыгъала гьеми хыди ч1ийине руъура, ти хыдиехьван еми хъалгардиший. Йик1иклана рухьура, мыс гьеми йикьиси, за гьанийды ера сивхир гарыват гъу1ля гъаъ гакъара сукьусий.
Йыгъырмыкла са улджумад йыгъа гьеми гъу1лиде хад хыдиес балана пис йишир, нафас лешус четин руъура. Мини ти хыдиеде рухьура, зас мыкьлана йиъи, гъара сес ваъ духтурахда, ва яки выды бегеде хад кнопкады т1или сывы1х — гьабыр дыкьас, зы кнопкады леркьара диш. Гьаса рухьура, к1ырк1ара сатыр, бегеде хад кнопкады т1или сывхы1р диш, эхир ки йикьир гьеми хыди. Тимбыйды ригиде хад шад йишир, гьанийды ера выдж кут1ас хьур.
Йидкьыр гъара духтурар гадкьыд хъикьир а, тинийда хуткур, вас хабар виширдишме гьухьуйне, ваъ хьур, зы сахыр ай. Быгады йыгъа духтурада гьухьур, валлагь изды гарыват гъу1лиде сивихь, зас гьади гъу1ля гъаъ гакъас йигара.
Духтураше гарыват биъир гъу1лиде сивхьид, гъу1ля шешун гьабгурдиш, са керпичед мас йиъи гьабгуд. Минийда лал хъи1пхьур. Шиви вада гьыъыд хьур, хулкара духтурара, гьис йиъи ва лал выъыд?
Гьада гьеминие ихтилат гьаъара, валлагь, гьание зас ха1р йыгъа дуьнйадид уфтанва1лид таариф гьаъарай, гъу1ля гъаъ гьадубгубишды, гъаъ ад шурукмашды, темизды ха1лды, ва мадды, мадды кардымыд.
Гьада духтурара рухьура, валлагь, гьанийис йокв гьагваддиший, гьание вас йик1быр гьаъарай, ядлымыд хаджалат джыъын бадана, вада лаъ лузас руъурдиш хьур, амма гьад йикьиди ва гьанийс кюмег гьаъас лейих йишир диш.
М. Казиева