21 июнас Дагъыстанад Кьухьды Рамазан Абдулатипова ва РФ-дид строительствадид ва ЖКХ-дид министред заместитель Андрей Чибисе иштрак гьыъыр Тарнаирский хьедбыр темиз гьаъад сооружениедид комплекс ачых гьаъади Махачкалди.
Иштрак дишибишды улихьде гьалгади Рамазан Абдулатипова гьухьур: «Эккед сагьул ваъас йыгара РФ-дид строительствадид ва ЖКХ-дид Министерствадид вылц1ад кюмгид бадана кьуле гыргас ихьды республикадид жилищно-коммунальный хозяйствадид суалбыр. Дагъыстанад Правительствадире шегьердид кьухьдыбишихьван ва строителешихьван сыт1а луза гьыъыр быт1рад объект. Ва гьадис гюре еда йикис гъийгъа Махачкалди халма сигас сахьусды темизды хьед. Бегедене ес лазим хъивикисдиш канал Октябрьской революции ва ишлемиш хъаъасдиш Вузовский озерадады хьед рагъынис.
Хьели гьа гвалах е выгыргаси Избербашди ва Каспийскади не Бабаюртди ки. Гьа зонади йикис йыхды темизды хьед.
Шегьерди абише уху1р йыгара хьед, джуду ер-юрт аа-уу хад. Гъийгъа Махачкала быт1рана вуруъура а, амма гьыъыр йыгад гвалахбыр ки бала йиъи. Махачкалди йишир йыгара йыхды хьидид, тукад, ва газад снабжение. Президентед сахьусды хайиш – илсанашды йыхды яшайиш йиъи. Гьа гвалахбыр кьуле гыргас Дагъыстана сиене аниъи. Гвалах йыхана выъыр йыгара ва уву1ху1р йыгара шегьер. Россиядид Министред кюмгихьван, гьадид кьухьдыбише Михаил Александрович Мене ва Андрей Владимирович Чибисе хыл йывхы1р ес, шегьердис, кьуле выгыргас йишир сиене программа илсанашис йыхды хьед высды.
Джуды суруула Андрей Чибисе гьухьур: «Тарнаирский хьед темиз гьаъад сооружениебыр ачых гьыъын — Дагъыстанад Кьухьды Рамазан Абдулатиповад командадид йыхана ваъара ад гвалахад гьунар йиъи ц1ам ихьды кюмег ки кине. Темизды хьед адишне яшайиш илсанашды йыха гьаъас йикисдис. Сиене ти хылис йыркьыйне гьыъыд меслягьа1тбыр республикадид кьухьдыбише кьуле йыгыр а. Гъийгъа зы Каспийскади ки йыхьыр ай, гьади ки ми гвалахбыр гьаъас йик1иы гъа. Эгер гьаса хъуъ йыдкьыхьвна, Дагъыстана балад карбыр йыхва1лиы ругъа гьаъас йикиси».
Мийманар таныш дишир блокмыхьван, хьедбыр темиз гьаъад, хьед темиз гьаъад химикатмыд станциедихьван, насосмыд станциемыхьван. Сиене гвалахбыр автоматизированныйбыр йиъи, гьадис гюре балад гвалахбыр экономит гьаъас руъура а.
Гьади генеки иштрак гьыъыр РД-над Правительствадид Седриед врио Рамазан Алиева, Махачкалдид мэр Муса Мусаева, РФ-над Правительствадид вице-премьер Гасан Идрисова, РД-над строительствадид, архитектурадид ва ЖКХ-дид министр Ибрагим Казибекова ва маддыбише.
Б. Мыха1ды
