Мыха1ды Бийжет-ришире (Гафарова) гьыъыд ихьды корреспондентес джуды нинды эвелды махвбыр
Авал-авал ай адиший са ма1хлиди гьа1замды хынимер. Гьемибыр дуруъусды вишири са йыгъа дама усбыр гьаъас. Дуруъуди гьемибыше гьухьури, яни ихьды ма1хлиди са Джертан хьур хыных а, гьеминийихда ки сес ваъас.
Дыхьыр рухьура: «Гьай Джертан, е дама усбыр гьаъас дуруъура, вы ки йикьа».
Гьаса гьухьуйне, минийды нине рухьура: «Джертан сагьа1л к1ыъка йиъи, гьанийда йикис диш».
«Къавгъу адиш, — гьухьур гьеми хынимеше, — е гьад шуунакиъди ехьван гыргас».
Нине хынхыд ху1рметда гьеми хынимешис кюкю ки выъыр кывыр ва мадды, маддыбыр улесдыбыр ки гихьир.
«Гадакь, изды хынхы ки макъыет диш», — гьухьур, — гьа вехъаъ к1ыъ ка йиъи».
«Яхчи», — гьухьур, гьеми хынимер ки Джертан ки еримиш дишир дама. Дама дыхьыр, сиене хынимеше усбыр гьаъади, Джертан са суруука гийхьир сукьур а. «Гьай Джертан, ва усбыр гьис джаъад, гьис сукьур а?». Гьаса хьуйне, Джертана джываб хъывылц1ара: «Уу, ихьды нине ва1с кюкю икал кывыриме, зас ки усбыр гьыъын бадана».
Мида гьеми хынимер сыт1а дишир Джертаныс ки усбыр гьаъара. Ыхьа1 ка гадкьыд, маа Джертан сукьур а, сиенебише шала вирит1ере а. Ва гьис и шала дживрит1ед гьухьуйне, Джертана рухьура: «Ихьды нине ва1с гьа1замды илесдыбыр кывыд шиви, зас кюмег гьыъын бадана».
Мида гьемибише шала ки йибт1ир хъу1дгъу1сды вишир. Сиене хъит1ине а, Джертан гьади гимара сукьур. «Гьай Джертан, вы гьис хъу1джугъу1д?»
«Ихьды нине гьухьуд дишийме, зас ва1 кюмег гьаъ хьур?».
Гьада сыные шала люхъу1вшур, сыные выдж ки утумые ахъагъур дама хала хъу1дире.
Гадкъыд улаа ки мыч1ахъа хъу1гъу1ре а. Хырыда ка са джигида йокв лик1уд гьалгвара а, са джигида ки тыла гъивилхъвара а. «Гьай Джертан, гьлиъне дуруъус ева1?, — хуткуйне. Рухьура: «Йокв гьагвад джигидыхдана дуруъус». Йокв гьагвад джигидыхда на дыхьыйне, тини аждамыед хал йиъий. Дыкьа, дыкьа, хьур, аждамый шад вишир, гьемибыр выше ка диъилес хьур. Джухда ад илед, рагъад ки кывыр, сатха даъара.
Аждамый йибкьыр хынимер сатхыр ад хала, хулкара, выш сахыр выш мара. Сиене сатхыр, Джертан мара.
«Гьай Джертан, вы гьис саджалхад?».
«Наха1н ихьды нине зас элидзий выъыр кывылц1ад виъий, гьа ливъийне, хьели зы салхад йиъи».
Чара вишир диш, аждамыере выъыр кывыр элидзий. Маа гьеми хынимер ад хала хъибкьыр хулкара, выш сахыр, выш мара. сиене сатхыр, Джертан мара.
«Гьай Джертан, вы гьис саджалхад?»
«Нине зас лывырса выъыр хьы1мыльды на1к кывылц1ад ий».
Выхьыр аждамыере зер везир, на1к хахъына хъу1вгъу1ре, лывырса выъыр кывылц1ара. Маа ыхьа1ка йибкьыр хулкара, выш сахыр, выш мара, сиене сатхыр, Джертан мара.
«Гьай Джертан, вы гьис саджалхад?»
«Ихьды нине зас сюфади ана хьед хъихид йиъи нац1урда, гьа рагъыйне, хьели зы салхад йиъи».
Гьада аждамый вуруъура сюф хана нац1урда хьед лешус. Сюф кывырха1ре нац1урда хьидик, сюфади хьед лубзур диш, гьемисе гьемид гьа1замды вахт вуруъура нац1урда хъу1джувгъу1д. Джертана гьа гедене гадийшде рухьура: «Гьай гадиер, еве аждамыес диъилес йигара а, еве хъадахас, зы ки утумые ахъагъ. Гьайвырдика хьидикла ки ка1хъа1ч1ур халыхда еримиш хъидикис». Нац1урды хьидид тисуру кахъа1ч1ур гадкъыд, ула йокв ачых руъура а. Аждамыере джубра лал ваъара а: «Гьа хынимер, ве гьа нац1урукла тисуру гьидире кахъа1ч1ур?» «Гьади а гид кьухьды духлад ру1х кыт1 хъыъыр гардана ийир ари кувуч1, хьели вада тисуру кувч1ус йикис». Мидире лешур ру1х ки аъ кувурч1уре, ыхьа1ка т1урлумп1 хьур ара саъ кивилхьвара хьидик. Хьидид кьане гьими аждамый викьире. Гьада Джертана гьухьури: «Ве зала кьухьва диъинехъун ки, вес са гьамал ки гьац1ар диш. Тиниъ гадакъ, аждамый ки викьири, еве ки сагъна халма хъу1диси.
Гьеми хынимер сагъна, шадна халы лехъедкьыри.
Джва1р гьади мадай, ева1 миди хъидкьыри. Зада садафад убра ийхабыр хахъый, гьабыр ки Усмагьа1лийды къариере ха1хъа1шур.