Дербентди шегьердид пляжед Набережный ачых выъыр ай

b9f836b6d32277cd3d1713006bec7f07

Гьарбад йыгъа, 7 июнас, Дербентди йыгыр ай эккед байрамад мероприятиебыр, шегьердид пляжед Набережный ачых выъынис гюре.
Шегьердид социалный инфраструктурадид ц1инды объект ачых гьаъад церемониеди иштрак гьыъыр Российский Федерациедид Северный Кавказад гвалахмыд министр Лев Кузнецова, РД-над Правительствадид седри Абдусамад Гамидова, РД-над Кьухьныйды ва Правительствадид Администрациедид кьухьды Исмаил Эфендиева, Правительствадид седриед заместитель – РД-над Минэкономразвитиедид кьухьды Раюдин Юсуфова, министреше, республикадид шегьермыд ва районмыд кьухьдыбише, ерлид илсанаше ва шегьердид мийманаше.
Хьурагине таныш дишир ай Набережныед ермыхьван. Дербентдид Набережные аниъи многофункциональный рекреационный комплекс 8,6 га ера луза гьыъыр ад. Гьади гьыъыр а спасательный станциебыр, подпорный мас 860 метри гъад, хьибыд площадка ки ана, велисепедмыд ва дирхьад ра1хъбыр, спортад ва хынимешды площадкабыр, этажбыр ад машинмысды стоянка 418 еред ва 22 артухды парковкадисды ер. Гьадыла саваенди, пляже йыдкьыд илсанар обслуживать даъасды пунктбыр. Парка сихьир а скамейкабыр, быч1мыд къабыр, юкьсура анивиъи шилвалды, ит1ир а йокбыр ки.
c9ee0df8ec1b3f8e1a6a6176125e482a

Ху1ляхвалды Набережный площадед -780 м, сиене сыт1а гьади а1тхьа1си 815 илсан.
Пляжед площадь йиъи 38 гьагъзыр м2. Набережный ваъара ква1ч1уд йиъи 2016 сыдыд сентябрь вазырыла хъуъ.
Гьади гьалгади, Лев Кузнецова гьухьур: «…Ихьды бырдж йиъий гьаса гьыъын, ми ц1инды объект шегьердид тарихед шикилек кикасна. Изды фикирда, еда гьа гвалах лювч1ур а. Ваъас йыгара сагъул архитекторашис, устарашис, мисед ц1амды вахтинди леч1уд кьуле гыргас мисед джетинды проект».
60ce9f0c3acaef621f1db4a763d819cd

Гьание йик1иы лихъийир, шегьер Каспиед бегеде хад виъид, ва ми проектере илсанашис, туристешис уфтанди ер выъыр а кьа1ч1ивалды угъувгъусды, ва джигьилер, кьа1сдибыр ягъмиш дикисды. Россиядид Минкавказад Кьухьние хайиш гьыъыр ерлид илсанашда, шегьердид мийманашда уха1ъ хьур проект, гьадикла йикисне шегьерди абишис ки, ва мийманашис ки визитный карточка. «Мидыла хъуъ ки балад ербыр, джыгабыр ц1ине хъаъас чалыш дикиси, ху1рметли дербентдибыр, выхьди кюмег кине»,- гьухьур Лев Кузнецова.
a4e60301a9107809ef6d0d6792fe6011

Абдусамад Гамидова республикадид Кьухьды Рамазан Абдулатиповад суруула, Халкьдид Маджлисед ва Правительствадид суруула Дербентди абишис къутливалдыбыр гьыъыр ми гвалахад бадана — Набережный ачых выъынис гюре. Сагъул выъыр ху1киметед кьухьдыбишис ва лично Президентес 2018 сыдыйык1ама вахт хъывыр хьур шегьердид 2000 сен йишидид мероприятиебяр кьуле хъыгас.
Гьание генеки гьухьур, Дербент кьыб дегиш вуруъура а, республикади туристешды центр руъура а.
«Гьадыла Правительствадире шегьер быт1рана выъын приоритетный гвалах на хывкьыр а. Миди кьуле выгыргара а эккед программа йисды халбыр гехъет1ир, илсанашис ц1инды халбыр луза гьаъасды. Гьаъара ад ц1инды халмыра эккед кьалыб гыргара а шегьерды. Са мистед сыда 14 многоквартирный хал луза гьаъара а, гьадыла саваенди туризмадид ва культурадид объектбыр ки.
Гьелбетдики, гьа сиене гвалахбыр йикисдиш кьуле гыргас шегьерди абишды кюмег кидишне, гьабыр сиене гьаъара ад йиъи дербентдыбишис, гьабишды яшайиш йыха гьаъас хьур, эвелды шегьердид кьалыб суга джаъасна, гьадид архитектурный ва культурный шикиль абгасна.
Гьац1ара, еда сыт1а дишир йикиси ихьды Дербентдикла ваъас гьамыъды, вахтиндире вагъа1д шегьер, быт1рад, мийманашис бегемиш викисды»,- гьухьур Дагъыстанад премьер-министре.
Мероприятие бегьем вуруъуди Россиядид Минкавказад кьухьние выр ай шегьердид мэр Малик Баглиевада символический Набережныед ачар.

Б. Мыха1ды