9 Майес Гъалибдишид Йыгъад байрам

20170509_094533 (2)

Мыха1д районди ки, сиене Россиядихьван сыт1ана, лап гуджлине йыгыр ай 9 Майес Гъалибдишид Йыгъад гвалахбыр.
Райондид «Победа» хьур оргкомитетед пландихьван, сиене му1къма ва гьу1киметед идарама йыгыр ай гьа байрамас таликьды гвалахбыр.
1 Майес Аады К1ат1ры1хъ выгыр ай волейбольный турнир, юкьсура ад джуды илсанар ки хъит1кьыр джама1хтис нубарак гьаъас хьур байрамбыр.
6 майес Къине выгыр ай 9 Майес таликьды мероприятие. Гьади йыдкьыр ай «Лучек» заставадады пограничникер ки.
7-ды — 8-ды майед йыгъырмыд арыди сиене Рутульский районди гьыъыр ай митингбыр, му1къмыд йыкьа1 ад кучыма «Бессмертный полк» хьур парадбыр йыгыр. Гьамык кине, Сыназыра выгыр ай райондид волейболад турнир, Амц1урды ачых хъыъыр ай, реставрироват хъыъыд, спонсораше танга выр, ц1инды памятник, да1види дыркьыдбишды ц1ырымыд хатирес сихьид.
20170509_102930

Сиене районди ад мероприятиемык иштрак гьыъыр ай райадминистрациедид уполномоченныйше райондид кьухьды Ибрагим Ибрагимов кьуле гине. Гьади халкьдис культурадид идарамыд къуллухчийше гьувга выъыр ай уфтанды концертный программа.
9 майес МР «Рутульский район» — дид административный центр Рутул му1къа1 йыгыр ай сиене райондид мероприятие.
Сагьа1т 9-ла 10-ды йыкьамаъ райадминистрациедид улихьде сыт1а дишир ай да1видид ва замгьы1тдид ветеранар, райондид кьухьдыбыр, республикадады уполномоченныер, депутатар, му1къмыд сельсоветер, ерли депутатар, ма1гьа1лимер. Мыха1 ад кьву1нды мехьтебырмыд телебиер ва къуллухчиер сыт1а дишир ай «Бессмертный полк»-ад джарга гьыъыр, шикилбыр ва транспарантбыр, венокбыр, быч1быр ва пайдахбыр хана.
20170509_110545

Са1гьа1т 10-дис райондид «Бессмертный полк» рыкъа1 увч1ур парадас Мыха1д йыкьа1 ад кучыдаа саъ, хьура сурначиер ки гине, ветеранар ки машинма адгъур.
Парадад кьулы гъани диъий МР «Рутульский район»-дид кьухьды Ибрагим Ибрагимов ва Дагъыстанад Халкьдид Маджлисед депутат Давуд Сулейманов.
Дыхьыр ми къушум аа Мыха1 ад памятникеде ва гьади гьыъыри эккед митинг, 9 Майед Йыгьас таликьды.
Сифте сиене кьухьдыбыр, ветеранашихьван сыт1а, дыхьыр лихьири венокбыр да1види дыркьыбишды ц1ырымыд хатирес сихьид памятника, гьади йыхы1ри шикилбыр, гьыъыри дугьа1.
Гьадыла хъуъ миди далгыри:
— доклад гьаъара, райондид кьухьды Ибрагим Ибрагимов. Гьание йик1иы хъыгыр сиене ихьды районди ад илсанаше диъид замгьа1тбыр да1видид фронта ва гвалахад фронта, гене ки агъмиш хъыъыр ихьды халкьдид духреше гьа вахтинды выъыд йигитвалдыбыр, фашистер тарг даъара, ихьды Ватан азад хъаваъара;
— нубараквалдыбыр гьыъыри ДР-дид ХМ депутат Давуд Сулейманова ДР-дид Кьухьнийды Рамазан Абдулатиповад, Халкьдид Маджлисед, Правительствадид ва джуды сураады;
— райондид ветеранашды кьухьды Сейфудин Моллаев;
— районди ад кьухьды ма1гьа1лим Фезли Курбанисмаилов;
— Ибрагимов Ибрагим Ибетуллаевиче гьыъыри сиене джама1хтис къутливалдыбыр джуду сураа, гьадыла саваенди ДР-дид ГосСоветед Почетный Седри Магомедали Магомедовад дурухла ки.
Гьади гене ки далгыр ай Махачкалда йидкьыд мадды кьухьдыбыр, да1видид ветеран Кичады Абдулгалим Курбанов, ветеран тылад Медет Ибрагимов, Мыха1д сельсовет Абдурахман Султанаев ва маддыбыр.
Гьадыла хъуъ райондид Кьуние выри ветеранашис багьад конвертбыр ДР-дид Кьухьды Рамазан Абдулатиповад ва джуды дурухълады, «Чистое сердце» хьур организациедид сура ва маддыбыр.
Гьади выр ай 2 медаль Сейфудин Моллаевас республикада сигыд.
Хьеликана ветеранашис ва мийманашис кывыр ай «Рутул» погранкомендатурадире сивхьид «солдаташды» кухниди наркомовский 100 гр. ва солдаташды ка1шир, «День Победы» на1ни ки гьаъара ана.
Гьадыла хъуъ миди майдана сыт1а вишид халкьдис гьувга выъыр ай уфтанды, байрамас лейихды концертный программа, Лира Айвазовара ва Саид Сулеймановара выгыргара.
Гьади «Аяз» ансамблед кьавалашды ва Музыкальный школадид магьа1лимешды чалышва1лихьван гьыъыр ай да1видид вахтиндид на1нибыр ва шиъирбыр, Хлютед Искусствадид школа ки кине. Майдана ад халкь лап разине хъавац1ур ай хынимешды коллективмыра гьагва гьаъад номермыхда.
Гьади гене ки на1нибыр гьыъыр ай дур-ун ад ихьды мисед артистеше — Вели Шахбанова, Телли Карибовара, Зарема Майсаровара, Илгар Османова.
Гене ки миди иштрак гьыъыр ай Махачкалда хъиркьыд певица Шахри Азизхановара ва са ки «джегьил ха1дий» Эльвира Яхъяевара.
На1нибыр гьаъара, выр ай шадды майдана мук1 ваъас мийманашде ва ветеранашде, сиенебише ки сыт1ана гап сувгъур.
9 Майед концерт лап бала гема мадай гьади шадды майдана, ветеранашис ва мийманашис ки выр ай байрамад банкет.
Гъалибва1лид Йыгъад 72 сен йишинис гюре выгыд байрам мисте лап быт1рана кьуле выгыр ай, сиенебыр разине, шадна сахъдалхур ай.

Къинады Саид