Эред Йыгъ

Дуьнйады гъа балад мусурманашды миллетбыр. Ха1р миллитдыхда анийиъи джуду джурба-джур гьа1датбыр, нубатбыр, хайиред, шейиред йыгъбыр, сывабыр ва мадды-мадды шадды йыгъбыр.
Амма сиенемыхъаъ балана гюзет ваъара Дагъыстанди ва Мыха1д районди мусурманад ц1инды сыдыд Эред Йыгъ.
Эред Йыгъ ихьды илсындире йыгад сывабала артухана, шадана арыди джаргыди гыргара.
Эред Йыгъад беслеме бала куьнед виъи, ата-бабыйшыла хъуъ ад виъи гьа байрам.
Куьнед вахтинди Эред Йыгъ гьац1ара гьаъарай ха1р джурудид лышнехьван, ха1р мукъу1хда джуду лышан ани йиъи.
Ихьды мукъа1 Эред Йыгъ гьац1ара гьаъара эред духлахьван, гьа духул гини виьи Лалаъанди дуруъуд эли рава.
Гьамыъ эвелды лышанбыр мадиш ва я гюзет хъаъардиш, рухьура ки, март вазырды хьуланды вахтинды.
Ц1инды сен — Эред Йыгъ эккед шадва1лихьван ва джурба-джурад дуьлхъинмыхьван сиргара.
Эред Йыгъ йиъи гьухьуйне, хьыле, рышба1 гъилы лидирхьвара хьарбыр гихьир хьыв-хьедбыр гьаъара садакьамыс.
Хьылеше хылаб лешур, биссмиллагь выъыр, сахьусды ху1рикла гьаъара лызыд, выъыр хьиб хьыв, лихьир выды ва гьыъыд нисе не ха1ред, йихире садакьадик. Ягъмиш дишир хьыле-хынимер, сиене ма1хлиды гъад илсанар, гьыъыр садакьабыр пай-гвал гьыъыр халма хъу1дире.
Нинабаше, хьар гивхьийне, хынимешис ха1р джурад лыздыд элидзийбыр, гъу1дидийбыр, ракъы1нбыр, къыкбыр, хынимер гъуьткесды, шад дикисды карбыр гьаъарай.
Наха1хда ка гадиер, ришбе сыт1а дишир дуруъура хвабыр иес хала-хала, ригяа-риге, халды иессиере джуду хылихда хъуд садакьадид карбыр ихъиере — емишбыр, къанфатбыр ва ширинлыхды карбыр.
Кьухьды гадиер ва ришба1 ягъмиш дишир, ришба1 джурана, гадиер джурана, сыкьы1с дуруъурай са хала. Ха1рние йихирей улед, рагъад, ер-емиш, выш йа1ква1 шадвалды ваъара лиерей.
Йа1ква1с дуруъурай садакьамык, пиред бегеде сыт1а дишир.
Джалахьуъ к1аъды хынимер дуруъурай эред кьвакьы, дюлхъес, дахас, кьулухъуйбыр гьаъас ва мадды шадвалдыбыр гьаъас. Гьемисед яхда ихьды ц1инды сыдыд гьа1датбыр ай.
Гьамыъ гьамыкла артухана мадад шывга мадиш, гьамыъ гьа1датбыр йыгъ-йыгъала, сен-сыдыла дегиш руъура а.
Амма Мыха1д мукъа1 гамыъ садакьадид гвалахбыр маа ки гуджли йишир а.
Ху1рметли Дагъыстандид, Мыха1д райондид илсанар!
Гъутли йишихь ва1с ихьды мусурманашды ц1инды сен -Эред Йыгъ.
Сагъ-шад дишихь!
Дуьнйа а1слягь вишихь!

М. Абакаров