Лучек йыгыр ай Эред т1арамды къутливалдыбыр

IMG-20170322-WA0036

22 мартас баласты Машрикьди (Восток) ад гьу1киметма илсанаше хьад йиъина ад байрам ваъара. Гьадид дур ки йиъи Навруз. Ихьды Мыха1д районди гьа байрамахда рухьура ЭР, ц1ахы1ребише ва к1ат1ры1хъы1йше Навруз рухьура гьадихда.
Кьвадхьусды сен и Лучек му1къа1 лап йыхана гьаъара а гуьриш ми Эред галды йыгъ.
Гьади сельсоветед, Дом культурадид, мехьтебед кьухьдыбыр сыт1а дишир, лап уфтанды программадихьван йыгыр ай байрам. Сифтене йа1ква1с ц1ый лик1ва гьыъыри Эред, гьадыла хъуъ джамаха1т сыт1а вишир майдана, йихири гьади садакьабыр.
Миди Дом культурадид къуллухчиеше гене ки гьагва гьыъыр ай халкьдид майдан, гьаъара уледбыр. Гьадыхьван кине миди сыт1а дишир Лучекды, Къинед ва Джилихурады кьавалар, къуллухчиеше т1арамды концерт гьагва гьыъыри.
Гьадыла хъуъ гьади йыгыр ай спортивный соревнованиебыр. Сыт1а выъыр джухьды кьва1б команда, йыгыри гиря хьуъ йийин, канат диъин ва са ки пневмовинтовка сивтири. Гьади лап шадана, йа1хъ ана, на1ни-макьам ана йыгыри ба1сбыр. Ахириндже «Ц1ыхъа1хъ» команда вишири гуджли.
Гирябыр лаъ кет1ид палыванар:
1-ды ер — Заман Махмудов, 101 р.;
2-ды ер — Гули Сафаров, 82 р.;
3-ды ер — Арсенали Мурадов, 60 р.
Гиря хувгъудбыр:
1-ды ер -Тарлан Шахбанов;
2-ды ер — Гули Сафаров;
3-ды ер — Заман Махмудов.
Канат (кыт1) диъин ва пневмовинтовка сивтинид ба1гьсыма ки лаъ вишири «Ц1ыхъа1хъ» команда.
Гьади лап активно диъий имам Заман Махмудов, депутат Шейхали Гарибов, сельсовет Иса Сафаров, мехьтебед кьухьдыбыр Бахтияр Майсаров ва Ханум Ибрагимова, Зарема Майсарова ва гьанийды сиене къуллухчиер.
Генеки миди ай кюмег гьаъара погранзастава «Лучеклады» уполномоченный ва контрактникер.
Йиъине ки, гьухьус йикиси – Лучек му1къа халкьдид гьа1датбыр у1ху1ре а лап йыхана, гьади ки лап чалыш йиъи джигьил сельсовет Иса Сафаров ва джухьды му1къу1д джегьил активистер, депутатар ва маддыбыр.
Йе ки ихьды редакциед суруула ваъара Эред байрам сиене районди ад шубэ-халкьмыс къутли, гьа1р са хала викий бахт-берекет, гьа1р са илсанас джандид сагъвалды, гьа1р са йик1е шадвалды.

Къинады Саид