Махачкалди вишир ай аксакалашды иджлас, ветеранашды Общественный организациедид 30-сен йишидид

 

1bc6f58eb3708abbd3e57a0742e51607

14 мартас Дагъыстанад региональный отделениеди Общественный организациемыра да1виед ветеранашды, вооруженный силамыд ва правоохранительный органмыра агъмиш гьыъыр байрам хьибц1ыр сен йишидид. Гьа байрамас гюре Русский драматический театра М. Горькийды дурухда хъуд вишир общественный организациедид региональный отделениедид пленум.
Гьади иштрак гьыъыр ай Дагъыстан Республикадид Правительствадид седриед сахьусды заместитель Анатолий Карибова, РД-над яшайишед лаъва1лид министр Расул Ибрагимова, РД-над Халкьдид Иджласад депутат Людмила Авшалумовара,ТОКСад командир, генерал-майор Омар Муртузалиева ва маддыбише. Сиене ветеранашихда сукур гьалгади, сахьусды вице-премьер Анатолий Карибова гьухьури, гьатхы1д сыда Дагъыстандид региональный отделениемыра да1вие дишид ветеранашды организациебыр, вооруженный силабыр, правоохранительный органбыр ва мадды, мадды силовой структурабыр ари ха1ч1уйне вишир а эккед кьуве ад джама1хтис кюмег высды, хайир высды организациебыр йишир а.
5b527e9b7a3ab35705afeb2290407adc

«Гьаса йишийне, гьаъарад гвалахбыр, къайгъубыр ветеранашды яшайиш, лиъин, лыъын йыха йишин лаъ гьаъас чалыш диъи.
Ветеранаше сихьир ад джан, кьувебыр сиене сферама лазим-герек руъура. Биссагьа1тди ихьды ветеранаше иштрак гьаъара а республикади ад гьалакьамыд на джама1хтид яшайишед ва къанынмыд процессбыр кьуле гыргад гволахма.
Генеки вац1ал ваъас йигара, Дагъыстанди гьаъара ад шадва1лид къайгъубыр ветеранашыла ассыллы на, гьабишды кюмег ки кине гьаъара абыр йиъи. Гьабыр джанде йик1 ад ва джу1хьду ч1ел кьуле выгыргад илсанар диъи», — гьухьур Анатолий Карибова.
Шадды, гуямишеды ихтилатмыхьван гьалгыри республикадид военный комиссар Даитбег Мустафаев ва генерал-майор Омар Муртазалиев.
Дагъыстан Республикадид ветеранашды Союзад Седри Магарам Алиджанова джуду выступление ади гьухьури, ветеранашды Общественный организациедире са системади гволах ваъара а Российский Федерациедид ветеранский организациемыхьван.
«14 мартас 1987 сыда учредительный конференциеди ветеранашды къайгъумыс разивалды выр ай. Гьа организациедид сахьусды къайгъу виъий ветеранашды яшайишвалды, гьабишды халмыд а1гьвалатвалдыбыр арыди-джаргыди йыгын.
Гьа къайгъумыд бадана мысга ха1силвалдыбыр гьаъара а студентешихьван ва мехьтебе ад хынимешихьван, гыргара а научно-практический конференциебыр. Гьис хьурди, сахьусды ветеранаше ала лаъ диъид джигьилешис угутад, несигьа1тдид ихтилатбыр гьыъыр йигара. Гьабишихьван хыл хыле выр гьасад къайгъубыр кьуле гыргара а ТОКСовцы рухьуд патриоташе. Гьадыла дыркьыдухъундыбышис ра1хмет виший»,- гьухьур гьание.
Мыха1д райондид суруула гьади иштрак гьыъыр ай ихьды аксакалашды организациемыд седрийше С. Моллаева ва Э. Эминова.
Гьа мероприетие лабт1уда хъуъ Общественный организациемыд кьухьдыбишис выр ай юбилейный медальбыр на орденбыр.
Мира Казиева