7 мартас Мыха1д Культурадид Управлениедид зала агъмиш выъыр ай хьылешды байрам – 8 Мартад Йыгъ. Гьадис гюре гьади ягъмиш дишир ай сиене идарама къуллухады гъад ва му1къа1 ад хьыле, рышба1, мехьтебырма ад хынимер — зал илсанаше ац1ыр ай.
Мыха1д хьылешис ва гьабишды дуруула сиене районди ад хьылешис къутливалдыбыр гьаъас йыдкьыр ай районди ад идарамыд кьухьдыбыр. Са ч1илихьван, обстановка гьа йыгъа гьа1къийкъат байрамад виъий, выг1леше хьылешис, са сынийис къутливалдыбыр гьаъара сиене шад диъий.
Мыха1д райондид кьухьды Ибрагим Ибрагимовад сураа администрациедид сураа ва лично джуду сураа ягъмиш дишир ад хьылешис хьадид быт1рад байрам хьурагине къутли выъыр райондид кьухьнийды заместитель Магомед Магаррамова. Гьание генеки йик1ыы лихъийир ягъмишдишибишис 8 Мартад тарих, гьухьур, гъийгъа ихьды ху1кимете хьылеше выг1лешихьван сыт1а иштрак гьаъара а сиене гвалахма — яхда анидиъи дур-ун ад хьыле: ма1гьалимер, духтурар, гьа1лимер, экономистер ва маддыбыр. Хьыдылды – халды йик1 йиъи, усул, берекет, хынимешды нин риъи, гьанийыла асыллы йиъи выг1лешды гьунарвалды, шадвалды, шад-гуямишвалды.
– Генеки, ху1рметли ихьды хъыдгад хьыле, Вас ми байрам нубарак виший, сагъ – шад диший, мысга Ва1 шад – гуямишне диший.
Ху1рметли ихьды нинабар, ришиймар ва рышба1! Ва1с сиъинбишис 8 Мартад Йыгъ къутли йиший, Ва1 шад дыъый выхьды выг1леше, хынимеше, хыдылаше хьур иштрак гьыъыд ва сиене райондид хьылешды дуруу ч1елбыр гьыъыр хьуланды кьухьдыбише: Б. Б. Магомедов – «Мыха1бишды ц1инды хабарбыр» хьур газетед редактор, К. М. Гусейнов — Мыха1д ЦСОН идарадид кьухьды, Р. А. Афраимов — райондид кьылевыъынид управлениедид кьухьды, С. С. Моллаев ва Э. М. Эминов — аксакалашды организациемыд седриер, А. А. Кулиев — райондид кьухьнийды заместитель.
Хьели выр ай райондид Культурадид управлениедире уфтанды концерт. Ведущий Мирзабек Азизханова бала гъелблир выгыр ай концертед программа.
Ихьды хьылешис быт1рад на1гьнибыр гьыъыр дур-ун ад республикади певецеше — Вели, Телли, Ильгар, Шахри.
Йыхды на1гьнимыд программадихьван гьади выступать дишир ай Мыха1д музыкальный мехьтебед хынимер ки.
Б. Мыха1ды
