13 январес сиене Россияди йиъи печатед Йыгъ. Гьа йиъи гьасаба гьаьара ад 1703-ды сыда Петр-I императорад кьарардихьван россиядид тарихды сифтед газет «Ведомости» хьур дур гъад тестикь гьыъыдыла хъуъ.
Видж гьа байрам Россияди учредить выъыд виъи 1992 сыда — гьадийыкьама СССР-ед вахтинди май вазыра къутли ваъарай Советский печатад ва радиодид Йыгъ хьур байрам ка.
Гьадис гюре, 13 январес Махачкала шегьерди Расул Гамзатовад дур гъад Национальный библиотекади выгыр ай эккед иджлас байрамад йыгъас таликьды.
Гьади иштрак гьыъыр ай республикади дур-ун ад журналистеше, министрствамыд къуллухчийше, республикади ад интернет-блогереше ва издательствамыд на типографиемыд къуллухчийше.
Ми байрамад иджлас выгыр ай ДР-дид информациедид ва печатад министр Бурлият Такболатовара. Гьание къутли выъыри сиъинбишис байрам, лалгыри байрамад тарихдикла. Гьадыла хъуъ гьание агъмиш гьыъыри, гъийгъад йыгъа шыв гьа1ле ади республикадид СМИ-мыд сферамыд агьвалатбыр, выъыри эккед сагъул гьа сферади гвалах ваъад сиене къуллухчийшис.
Гьади генеки далгыр ай ДР-ди журналистешды Союзад Седри Али Камалов, ГТРК «Дагъыстан»-ад кьухьды Луиза Алиханова ва мадыбыр.
Гьадыла хъуъ, байрам къутли ваъара, министр Бурлият Такболатовара артухана гвалах ваъад, дур-ун ад журналистешис, издаталешис ва блогерешис выри ДР-дид печатад ва информациедид Министерствадид Почетный грамотабыр.
Гьади агъмиш дыъыр ай ихьды редакциедид къуллухчиер ки — Почетный грамотабыр выр ай Тимур Махмудовас ва Саид Сулеймановас.
Къинады САИД

P.S. Ихьды газетед коллективед суруула ки е гьаъара къутливалдыбыр сотрудникешис, ихьды юлдашешды «Нур» газетед коллективес ва сиене Дагъыстанди ад журналистешис, редакциема ва издательствамагвалах ваъадбишис байрамад йыгъ.