Ми йыгъырма Мыха1д джама1хтид гьа1датмыт культурадид Центра выъыр ай гьа1зыр эккед стенд. Гьадид натиджа виъий — «Терроризмадис Ваъ!». Гьа выгыдид себеб виъий джигьилешды ва мехьтебе ад хынимешды йы1кьа1 терроризмадид ва экстремизмадид профилактикадид гвалахбыр йыгын бадана.
Централизованный библиотечный системадид читальный зала эккед стенд сыт1а гьыъыр а. Гьадиы дур лихьир ай «Ваъ терроризмадис, ва экстремизмадис Кавказди!». Стенда лихьид шикилмыра гьагва гьаъара а, шууды писвалдыбыр гьаъара ади террористешды нагьакьва1лире: гьади шикилек кинийиъи дешере ад, лы1х гъад нинабар, гьади гьадубгура а дагулана кал нагъ темиз хъаваъад кьа1сды дидабар, йараллыд кьаъды хынимер ва лука гъыъыд хал-лахбыр… Гьа стендахда гакъыд гедене, гьеч са инсан ки фикирдик киджирхьур аргасдиш.
Миди стендахда гадкъас, сес выъыр, йит1кьыр ай библиотекамыд къуллухчиер, райондид культурадид Управлениедид ва ЦБС-ед аппаратад ишчиер, джегьилер ва кружокма сыт1а дуруъуд хынимер.
Сифте миди лалгыри ЦБС-ед директор Зерифе Магомедрагимова. Гьание гьухьури, ми стенд сыт1а гьыъынид натидже — шыв писды кар виъиди терроризм ва экстремизм.
Хьели сахьусды докладчикне миди лалгыри Мыха1д хынимешды библиотекадид директор Эсбет Азизханова. Гьание выъыри терроризмадид мыкьлава1ликлады гаф, шыв натиджадихьван джамаха1тмыд арыди да1ви-къал иверди, шыв йыгъ руъурди гьадыла инсанашы — хьылеши, хынимеши, кьа1сдыбиши ва мадды тахсир кидишдыбишиы.
Хьели Эсбет Азизханова, рыхьыр гьа1р са шикилед бейде, гьади фотокорреспондентеше ва художникеше гьагва гьыъыд терроризмадид ч1ирид, лап писды гвалахбыр генеки миди ад хынимешис ва джегьилешис гьагва хъыъыри. Сасад шикилмыра, шикил вырыхы1д устадвалихьван, йиъине ки лап йыхана гьагва гьыъыр а терроризмадид лап писды, инсансызды гвалахбыр.
Миди сыт1а дишибишды улихьде генеки далгыр ай библиотекамыд къуллухчиер — Мергем Гасанова, Сехерназ Касумова ва маддыбыр.Терророизмадихда йурт ва ватан аддиш, гьадихда дин-иман вуруъуд диш хьур рухьурай миди далгыд сиенебише, ва е ки, ихьды газетед къуллухчийше, мысга гьаса рухьуд и!
Аала лаъ хъуд джегьилешис гьац1ыйне ми терроризмадид ч1ирид гвалахмыкла балана дуьзды эхтилатбыр ва хабар, гьабыр ки дикиси макъыет, гьабише ки ваъаси йыхдыдид ва писдыдид джурава1лид фикир!
Гьадыхьван сыт1а хайиш йиъи ха1р са хала диде, нине джуьхьды веледмыс мысга ихтилатбыр гьыъыр йыгара, шыв писды карбыр йиъиди терроризм ва экстремизм.
Къинады Саид