Рамазан Абдулатипов: «Сахьусды ихьды бырдж — дюзгюнды сечкибыр йишин Дагъыстана!»

973A8128_result16 августас Махачкалдид Дом дружбади дестикь гьыъыр дагъыстанабишды регионад политический паритиемыд «За честные выборы!»-хьур Меморандум.
Гьади иштрак гьыъыр Дагъыстанад Кьухьды Рамазан Абдулатипова, РД-над Халкьдид Маджлисед Седри Хизри Шихсаидова, РФ-дид Госдумадид депутат Гаджимет Сафаралиева, партиемыд кьухьдыбише ва маддыбише.
«Гъийгъад йыгъ Дагъыстан Республикадид тарихед джываб гъад вахт виъи.
Россиядис гъараа аъна гьаъара ад гуджмыхда гадкьыйне, е ихьды арассурад савалды мааки гъуджли выъыр йыгара, ари йыха1 гьыъыр сиене сагъды халкьдид кьувебыр гюзет гьаъара конституцие, йыхды гвалахбыр, ватан хъывгынвалды ва эдемивалды. Ху1кимете ари са инсан ки хакьыр йыгардиш политикне, эгер гьа ч1ирине гьалгара йишийне. Йик1иы джыдгас ки йикисдиш ва гьасабыр ки, джама1хтис джыдгарана чалышды сечкибыр ква1ч1усма гьабыр ч1иридбырна халкьад»,- гьухьур Рамазан Абдулатипова.
РД-над Кьухьние йик1иы лихъийир, 2011 сыда Халкьдид Маджлисед сечкима иштрак гьыъыр ай 6 регионад партиемыд отделениемыра, амма гъийгъа гьасад сечкима спискамыхьван гьагва гьыъыр ай 16 партие, 2015 кандидат.
Рамазан Абдулатиповад ч1елмыхьван, сиене джамаха1тмыд хайишбыр мааки гюзет гьаъас, гьадыхьван сыт1а республикадид шегьермыд, му1къмыд инсанашды хайишбыр ки балад подходмыхьван арыди-джаргыди гыргас йикиси.
«Эгер е лаъ-хьуъ кине хывыркьара йишийне Россия, Дагъыстан, сечкибыр ад геде хьалаа сихьир йыгара хусуси, са партиедид амбициебыр, сахьусды ера йишир йыгара ихьды Ватандид гвалахбыр. Миди лаъ хъудиш сечкима викисды гъалибвалды, лаъ хъу ха1р са инсанад чалышвалды халкьдид гайгъубыр кьулегыргасды. Ихьды сиенебишды партия — Дагъыстан виъи»,- гьухьур регионад Кьухьние.
973A8059_resultРамазан Абдулатипова генеки хайиш гьыъыр сечкибыр «т1алхъыд» гвалахмыхьван йыгыр йыгардиш хьур. Мыхьджеб, дерехинвалды, йыкьа1хла гьалгынвалды — ихьды культурадис лазимсызды гвалахбыр йиъи. Банымыд инсанас дюзды ч1ел мысга хывкьын, дюзгинвалды мысга лаъ хъуд карбыр йиъи. Ихьды сиъинбишды бырдж — джамаха1т ва е ки дюзды гвалахад рыкъа1 эдин».
«Гъийгъа сиене йыхды гвалахбыр ми сыдырмыд чалышва1ллихьван йыха руъуд гедене дагъыстанабишды яшайишед сураа, мааки гьамыс хыл йывхы1р кьуве выр йыгара. Ц1инды выборма партиебыр на кандидатар йит1кьыр йыгара кьуле йыкьасды проектбыр хана ха1р са райондид, шегьердид республикади ад. «За честные выборы!»-хьур Меморандумара гьагва гьыъыр йыгара Дагъыстанад сахьусды политикадид силабыр гьазыр йиъид йик1 сихьир гвалах ваъас ихьды республика бадана»,- гьухьур Рамазан Абдулатипова.
Джуду суруула РД-над Избиркомад седри Магомед Дибирова хабар выъыр, 20 августас кувхъу1ре а сечкимыд агитациедид вахт СМИ-мыла хьуъ: сиене кандидаташис сакална высды йиъи ихтиярбыр гьа гвалах выгыргас средства массовый информациемыла хьуъ.
«Сечкимыд йыгъад гьазырва1лис Избиркомара выгыргара а эккед гвалах ва миди ихьды сахьусды бырдж йиъи сиене избирательный кампаниедид иштракчийшис сакалды условиебыр вын. РД-над Халкьдид Маджлисед депутаташды сечкима иштрак гьаъара а 11 политический партиедид региона ад отделениемыра, Госдумадид депутаташды сечкима хьибды самандатад округа – 30 кандидатара, гьабишикла 25 — политический партиемыд инсанар ва 5 — самовыдвиженциер диъи»,-гьухьур Магомед Дибирова.
Республикадид иджласад Седри Хизри Шихсаидова сагъулбыр гьыъыр РД-над Кьухьнийис Меморандумад бадана, гьухьур гьа документ лазимды йиъи дюзды сечкимыс. Гьадыла саваенди, хайиш гьыъыр политический партиемыда дюзды гьа1джетмыхьван хьуъ дыкьа хьур, душманар джитшир сасынийис, ачыхна гвалах ваъ хьур дагъыстанад джамаха1т бадана.
«Дагъыстанад Кьухьние джуду Халкьдид Иджалас сигыд Посланиеди гьухьур ай ц1ине выъыр йыгара хьур депутаташды корпус, ра1къ выр джигьилешис, хьылешис. Гьа гвалах е выгыргара а, ва гъийгъад йыгъахьван дегиш дыъыр а 50%-ла баладбыр, гьабишик кинидиъи 15% джигьилер. Я, сиенебишы, джываб гъа сечкибыр ка1гъу1ма ва гьабыр гыргади ки.
Меморандум дестикь гьыъыныла ассыллы йиъи балад гвалахбыр, шудаъ дюзгинне, гьакьна-кьулна кьуле гыргасды йикисды сечкибыр.
Сиене партиемыс сахьусды кьул хьура йишир йыгара халкьдид къавгъу-дердибыр», — гьухьур Хизри Шихсаидова.
973A8192_resultГьади генеки далгыр ай политический партиемыд представителер умудлы диъи хьур сечкибыр дюзгюнне йыгыны, рази дишир кьабыл гьаъара ад документа.
Трудовой партиедид регионад отделениедид кьухьды Анварбек Кадиева гьухьур: «Гьыъыр йыгара партиемыд штаб ва телефон «горячей линии», нагьакьды гвалахмыд инсанашда хабар выс йикисды. Сечкибыр йишир йыгара йишидыхъунды ачыхдыбыр. Меморандум дестикь гьыъынире бала ваъара умуд властя ва сечкимы».
Регионад Кьухьние гьыъыд ихтилатас выр раазивалды, генеки гьухьур, сиене партиемыд сыт1ад проект гьыъыр йыгара предпринимательство лаъ-хьуъ ваъасды.
Бегьем дуруъуди Дагъыстанад Кьухьние гьухьур: «Ихьды сахьусды бырдж — Дагъыстан Республикади дюзгюнды сечкибыр йыгын».

Б. МЫХА1ДЫ