Махачкалди Дагъыстанад Конституциядид Йыгъ агьмиш гьыъыр ай

23f0a8bab549935216037888fe9f700d26 июлас Дагъыстана агъмиш выъыр ай симене халкьмыд байрам — Конституциядид Йыгъ.
Йоквала хъуъ меркезед площади ачых гьыъыр ай халкьмыд майданбыр, гьагва гьаъара мийманашис джуьхьды эвелды ва гьамыъды тарихед гьакьасабыр, Дагъыстана ешемиш дуруъубишды. Сиене сыт1ана ай 14 майдан 28 районда. Ха1р райондире иштрак гьыъыбишис гьагва гьыъыр ай джуьхьды культурадид балавалды.
Районма йыдкьыбише, лыъыр атабабыйшды халкьдид валыг ки, мийманашис ху1рмет ваъара ай ха1рса джура улесдымыхьван, емишмыхьван, мук1мухьван.
Гьа йыгъа ха1р инсан ва меркезед мийман таныш йишир ай усуд дурумыхьван, парчмыхьван, къеденмыхьван хьылеше лаъад гымышмыхьван, эвелды валыгмашихьван ва мадды кардымыхьван. Ха1р майдана, лыт1а гьыъыр ад эвелды геденмыхьван, хьылеше гьагва гьаъара ай эвелды гьаъад гвалахбыр, сасабише к1аз вурукара ай, маддыбише дын ырха1ре, т1улкара ай, бязибише кьыдид сукуйбыр гьаъара ай. К1аъды чадырмыхьде сихьир ай инсанашис гьагусна эвелды дыланбыр ва дзырад синибыр, Хунзахский, Унцукульский, Кубачинский, Харбугский изделиебыр ва Дагъыстанад ху1киметед музеед шикилбыр.
Дагъыстан Республикадид Кьухьды Рамазан Абдулатипов Махачкала шегьердид кьухьды Муса Мусаевыхьван ва мадды кьухьдыбишихьван таныш йишир сиене Дагъыстанад халкьмыхьван. Му1къма йыдкыд инсанашихьван гьабише суьгьбетбыр, га1ш-мыкьбыр гьыъыр, хуткун-суалбыр гьыъыр.
Наха1дыхда меркезед площади йишир ай байрамад концерт. Гьади РД-над Кьухьды Рамазан Абдулатиповала саваенди иштрак гьыъыр РФ-дид Северный Кавказад гвалахмыд министр Лев Кузнецова ки, министерствамыд ва ведомствамыд кьухьдыбише ки.
Гьади Конституциядид Йыгъас гюре ягъмиш дишидбишис къутлива1лид ч1елмыхьван далгыри Махачкала шегьердид кьухьды Муса Мусаев, Дагъыстан Республикадид Конституционный Судад Седри Магомед Халитов. Гьабише генеки ихтилат гьыъыр Конституциедид тарихекла, шууна гьа 2003 сыда кьабыл выъыд виъиди джетинды гьакасаб ана Дагъыстана.
Хьели выр ай эккед концерт Дагъыстанад ва Россиядид устараше. Концертала хъуъ выр ай эккед байрамад фейерверк.