20 июлес СКФО-ди ад Российский Федерациедид Президентед полномочный представитель Сергей Меликов ва Дагъыстанад Кьухьды Рамазан Абдулатипов гьа1сил дишир РД-над Правительствадид къуллухчийшихьван, правоохранительный органмыд кьухьдыбишихьван, Махачкала ва Дербент шегьермыд кьухьдыбишихьван. Совещаниедид иштракчийшис хабар виъий полпредед дуруу йыдкьыд инсанашды обращениемыкла, выгыргара ад гвалахакла гьамыд бадана.
Сергей Меликова гьухьуд кал, баласды аппаратад дуруу сигыр ад обращениебыр йиъий суалмыд, ч1ирине вынид навкьбыр балад кватирабыр ад халбыр луза гьаъасды ва гьа объектбыр гьаъас ихтиярбыр вылц1ад документбыр вынид.
Гьадыла саваенди, гьухьур ай, кьва1дхьусды баласды обращениебыр сигыр ай жилищно-коммунальный хозяйствадид гьакьасабырмыд ва суалмыд, шууна йыха гьыъыр йыгарди инсанашды яшайиш, йисды халма переселит дыъыд.
Полпреде йик1иы лихъийир, бегедене вишид Роспотребнадзорахьван совещаниеди, РД-над Правительствадид Седри Абдусамад Гамидова ки иштрак гьыъыд, кьабыл гьыъыр ай решение август вазыры йыкьама мистед сыдыд гьазыр гьаъас хьур ермыд схемабыр ч1идкьыд бытовой отходмыд.
Джуду сура Абдусамад Гамидова хабар выр, гьадид бадана гвалах ваъара ква1ч1ур а хьур.
Дербентди гьухьусды йишийне, премьеред ч1елмыхьван, сахьусды эккед объект йиъи моредид къирах, федеральный программадик кийир ад. «Сиене тангабыр йыхы1р а, августас гвалахбыр ква1ч1уси ва бегьем йикис сыдыд ахирес. Кьва1дхьусды кьухьды объект — мехьтеб №15 виъи, бегьем ваъара ад. 15 августас е гьа кьабыл ваъас. Аэропортат бегеде ваъара ад хынимешды садик бегьем виъи хьур гьухьус йикиси ва гют1юр а ачых выъынихьде»,- гьухьур гьание.
Дагъыстанад Правительствадид Седриере йик1иы лихъийир, 2015-16 сыдырмыд гвалахбыр гыргара а кьуле ры1къмыд картамыра йагъа1дкал. «Город Дербент» шегьердид округад администрациедире гьагва гьыъыр а ербыр ва ква1ч1ур а гьаъара 13 балад квартирамыд халбыр: «Сыдыд ахира йыкьама бегьем гьаъас йик1иы гъа 14 гьагъзыр кв. метри халмыд ва гьама переселит даъас хьур 900 инсан (300 хизан) йисды халма. 2016-2017 сыдырма плынди а бегьем гьаъас хьур 25 гьагъзыр кв. метри халмыд ва переселит гьыъыр гьамма 500 хизан».
Б. Магомедов
