6 июлес, сиене Дагъыстана агъмиш выъыр ай сивид-свабад байрам. Гьадис гюре РД-над Правительствадид Седри А. Гамидовад Постановлениедыхьван 6-7 июлед йыгъбыр выходнойбыр гьыъыр ай.
Агьмиш выъыр сивид-сывабад нурдид байрам Мыха1д районди ки. Гьадис гюре куб ваъад инсанар сагьа1т 8 йикисма ягъмиш дишир Галды мездике, гьа1рние вахтинди, байрамад куб кувч1усма выр ай хизындылады фит1ри-закяхьа1т.
Хьели, байрамад салат кыъыдыла хъуъ, сагьа1т 8-дис, ягъмиш дишид юлдашеше выъыр Салят уль-ид хьур куб.
Гьа куб ваъасма райондид имам Таиров Абдуселиме выр ч1ел Мыха1д райондид кьухьды Давуд Сулеймановада.
Гьание джуду суруула, администрациедид суруула, райондид иджласад депутаташды суруула къутли выъыр сиене сив хакьыбишис, районди ад мусурманашис сивид-свабад байрам, гьухьур, Аллагьара кьабыл гьыъый Рамадан вазыра хакьыд сиъинбишды сивбыр, гьыъыд мевлидбыр, садакьа-нафакьабыр ва йыхды ниятбыр на дилегбыр. Хайиш гьыъыр куб-дин гьаъабишда аала лаъ диъид джигьилер дюзды Ислам диндид рыкъа1 эдис чалыш диш хьур.

Са райондид кьухьнийда ва са имамада гьа гвалах лювч1ус диш. Сиене дюзгинды фикир адбише, куб-дин гьаъабише, дидабаше-нинабаше, магьа1лимеше, гьа1лимеше сыт1а хана кьуле эдис хынимер чалыш дишир йыгара, писды, йыхды гьац1асна. Генеки хайиш гьыъыр йывы1х хьур хыл-худ ху1киметес динди ад инсанаше, Дагъыстан Республикадид Кьухьды Рамазан Абдулатиповад ва Россиядид Президент Владимир Путинед рыкъа1 а1ч1ур хьуъ дыкьа хьур ми джетинды вахтинди, йисхьурди сиене халкь са вишийне и, секки душманада гъарады ес зиян выс, гудж-бас ваъас йикисдиш хьур.
Райондид кьухьнийды ч1елмыс кьуве выр Мыха1д райондид имама ки.
Кубала хъуъ сиъин ягъмишдишибише са сынийис генеки гутливалдыбыр байрамад гьыъыр.
Гьа йыгъа ха1р хала гьазыр йиъий къалинды, йыхды улесдымыд уст1улбыр.
Халаа-хала дуруъура, улере, шадвалды ваъара, къутливалдыбыр са сынийис гьаъара кьву1нды йыгъа мабай гьа байрам…

А. Ибрагимов,
Б. Мыха1ды.